Ka disa mënyra se si mund të kurseni energji elektrike gjatë verës dhe nëse mundohemi që te secila paisje elektrike të zbatojmë mënyrat e kursimit si më poshtë, ju do ta vëreni sa shumë keni kursyer energji elektrike, posa që ta pranoni faturën e muajit të ardhshëm.

Bojleri

1. Mundohuni që bojlerin ta mbani të ndalur gjatë ditës, apo së paku të zvogëloni kohën gjatë të cilës bojleri qëndron i ndezur.
2. Po ashtu nëse është e mundur, mundohuni që ta zvogëloni temperaturën në termostatin e bojlerit, së paku për 3 gradë celsius.
3. Gjithashtu, kufizoni shpenzimin e ujit të ngrohtë aty ky është e mundur, si p.sh në lavamanin e kuzhinës apo të banjos.

Gatimi

1. Përdorni gazin natyror si burim të energjisë për gatim, atëherë kur keni mundësi.
2. Përputhni madhësinë/sipërfaqen e tenxheres suaj të gatimit me madhësinë e pllakës së sobës elektrike. Përdorimi i një pllake të sobës elektrike më të madhe se tenxherja e përdorur për gatim, lejon që nxehtësia të transferohet në dhomë dhe të mos shkojë aty ku duhet.
3. Ndalni energjinë në furrë apo pllakë te zierjes së paku 3-5 minuta më herët (para se ta largoni ushqimin nga pllaka apo furra).
4. Vendosja e kapakut në një tenxhere lejon që përmbajtja të gatuhet ose zihet më shpejt, duke përdorur më pak energji.
5. Përdorni enë të cilat i përshtaten volumit të ushqimit të përgatitur. Mos ngrohni ujë me tepër se sa ju nevojitet.
6. Hapni derën e furrës vetëm kur është e nevojshme, që të mos largohet nxehtësia nga paisja elektrike.

Frigoriferi

1. Zvogëloni nivelin e ftohjes në nivel optimal p.sh. nga niveli 4 në nivelin 1 apo 2. Kjo do të kursejë 20 deri 30 % të energjisë së shpenzuar më parë nga frigoriferi.
2. Hapni derën e frigoriferit vetëm kur është e nevojshme që të mos largohet i ftohti nga pajisja elektrike.
3. Prisni derisa ushqimet e nxehta të ftohen përpara se t'i vendosni brenda në frigorifer. Kjo do të shmangë që frigoriferi të punojë më shumë se që duhet normalisht për të mbajtur brendësinë e tij të freskët.

Kondicioneri

1. Kondicioneri mund të harxhojë shumë energji në ditët kur temperatura është mesatare. Fikni atë kur nuk është i nevojshëm.
2. Programoni termostatin e kondicionerit të mos fillojë derisa temperatura e brendshme të kalojë 24°, që konsiderohet të jetë temperaturë efiçiente e dhomës gjatë verës.

Tjerat paisje elektroshtëpiake, pajisjet elektronike dhe TV

1. Përdorni në mënyrë sa më racionale rrobalarësen dhe enëlarësen.
2. Të mos i përdorim ato, pa i mbushur me enë/rroba maksimale - aq sa është e lejueshme.
3. Në hapësirat ku nuk kemi nevojë për ndriçim, t’i fikim dritat.
4. Hiqni nga priza pajisjet elektronike në rastin/kohën kur ato nuk përdoren. 
5. Përdorni programet të cilat janë efiçiente, kështu kurseni më shumë energji elektrike. Jo çdo herë duhet të zgjedhim programet më të gjata dhe me ujë të vluar.
6. T’i përdorim këto pajisje jashtë kohës së pikut të kërkesës për konsum, atëherë kur energjia elektrike është me e lirë (23:00 - 07:00 gjatë verës).